الجاذبية .. لناظم الحاشي

الجاذبية انفقدت بدم الحسين ... @@@ ... وقوة نيوتن بقت متوهمة
شلون دم حسين ما رد للتراب ...@@@ ...ليش ما طاح وشنو الحكمة ولمة
اذن جان حسين اقرب للاله... @@@ ...وخارج انظار الجموع المجرمة
ومن شمر دمة اذن جان اتصال... @@@... بين جف حسين واطراف السمه
لو فرضنا الدم اخف من الهواء... @@@ ...والجبال من الارض ترفعها ريح
اذن فوك الكاع متسيل الدماء ...@@@... والرسول باحد ما يوكع جريح
وجان ما سالت دماء المؤمنين... @@@ ...ودم علي الكرار مالازم يطيح
اذن جانت معجزة بدم الحسين ...@@@ ...وجان قانون الجذب جداً صحيح
وما اكول حسين افضل من ابوه ...@@@... وجدة اعظم منه وارفع منزلة
لاكن بدمه ذبح كل السيوف ...@@@ ...وهاي معجزته الحسين بكربلاء
لو ما دم حسين ما ضلت جباه ...@@@... تعبد الباري وكتابه ترتلة
ولو ما دم حسين ما طاحت عروش ...@@@... ولو ما دمة الظلم ما جان انجلة
ولو ما دمة الدين ما جان استقام... @@@... وهذا قولة ومن كدر يجاهلة
ولو مدم حسين طعنوا بالكتاب ...@@@ ...وجان رفضوا حتى باء البسملة
للقيامة يظل نهر دم الحسين... @@@ ...يروي كل ثائر عزيمة ومرجلة
ودمة يوم الصعد لاطراف السماء ...@@@... سهلة عند الخالق ومو معظلة
الكاع خافت من ذنب دم الحسين ...@@@... والسماء اتوسلت تستقبلة
ونزل جبريل ورفع دمة الشريف ...@@@... لان قبل الكاع راد يقبلة